Arben Çokaj:PD është kthyer në parti bolshevike, Berisha largohu!-nga Redan Bushati

PD është kthyer në parti bolshevike, Berisha largohu!

Intervistë e personalizuar me ish-aktivistin e PD-së dhe ish zv. kryetarin e Unionit Studentor, Arben Çokaj

Bisedoi Redan Bushati*)

Në Shkodër s’bëhet asgjë pa lejen e Topallit…

Meqënëse vij nga Danimarka dhe Gjermania është më se normale të jem kritik e kërkues njëherësh për nivelin primitiv politik, në të cilin gjendet politika shqiptare. Jam ftohur përfundimisht me organizimet e PD-së pas shpërthimit në Gërdec, në mars 2008. Kur ndërtohet një fabrikë e tillë çmontimi kushtet e sigurisë duhet të jenë maksimale dhe është përgjegjësi e shtetit, ministrit të mbrojtjes dhe e kryeministrit, që kushtet teknike të sigurisë të respektohen.

Berisha në krye të PD-së drejton me dorë të fortë. PD-ja nuk ka frymë demokratike si parti dhe nuk bazohet mbi parime demokratike, mbi mendimet e lira e të hapura të anëtarëve të saj, apo mbi diskutime e propozime nga baza e partisë. Gjithçka varet dhe vjen nga lart, ndërsa të tjerët dëgjojnë me hir ose me pahir. Kjo nuk është politikë demokratike, por bolshevike. Para pak kohësh dëgjuam një lajm, ku dhëndri i një anëtari të PD-së anëtarësohet në PS. Mu për këtë arsye e pushojnë nga puna vjehrrin, që ishte anëtar i PD-së. Nuk është kjo një formë persekutimi bolshevik?!